КАРАКОЛ, 26-июл. — Sputnik. Учурда Каракол шаарында Жусуп Абдырахманов атындагы көчөдө кеңейтүү иштери жүрүп жатат. Андыктан калаа тургундары бир кылымдан бери өсүп турган жаңгак багы кыйылып калбайбы деп тынчсызданып жатканын аймактык кабарчы билдирди.
Каракол шаардык жашылдандыруу муниципалдык мекемесинин жетекчиси Эрмат Жумаев кабатырланууга негиз жок экенин айтты.
"Караколдун көркү болгон жаңгак багы кыйылбайт. Бул жалгыз жаңгак Абдырахманов көчөсүнүн жогору жагында өсөт. Ага шаардын тургундары эле эмес, келген туристтер да таң калышат. Аны кыйып салуу туура эмес деп ойлойм. Тилекке каршы, жолду кеңейтүү иштери болуп жаткандыктан 20 терек, 7 кайың жана 90го жакын кара жыгачты кыюуга аргасыз болуудабыз. Бирок жол жасалгандан кийин жашылдандыруу иштери планга киргизилди" – деди ал.
Шаардын жашылдандыруу муниципалдык мекемесинин жетекчиси көчөлөрдү кеңейтүү иштеринде арыктарды жылдыруу планга киргизилбегенин айтып, бирок көйгөй курч бойдон калып жатканын билдирди.