БИШКЕК, 22-июл. — Sputnik. БУУнун өнүктүрүү программасынын администратору Ахим Штайнер Кыргызстан менен алаканын бир багыты — өлкөнүн мамлекеттик башкаруусу менен экономикасын санариптештирүү алкагындагы кызматташуу экендигин айтты. Бул туурасында өкмөттүн маалымат кызматынан кабарлашты.
Администратор бул пикирин Кыргызстандын вице-премьери Замирбек Аскаров менен жолугушууда айткан.
Алар Нью-Йорк шаарында "Туруктуу өнүгүү боюнча саясий форумдун жогорку деңгээлдеги сегменти" деп аталган иш-чаранын алкагында кездешкен.
Вице-премьер 2020-жылдагы туруктуу өнүгүүнүн максаттарынын жетишкендиги боюнча улуттук баяндама жасоо ниетин айткан. Ал өлкөдө 2018-2040-жылдарга карата туруктуу өнүгүү жаатында улуттук стратегия ишке ашып жаткандыгын, анын ичинде 2019-жыл - Аймактарды өнүктүрүү жана санариптештирүү жылы деп жарыялангандыгын кабарлаган.
Штайнер жолугушууда кыргыз тарап менен мындан аркы кызматташуу уланарын айткан.
Ал эми Аскаров Штайнерди Кыргызстанга келип кетүүгө чакырды.