ОШ, 18-июл. — Sputnik. Кадамжай районунун Ак-Турпак айыл аймагынын Миң-Чынар айылында милициянын аймактык пункту менен кошо аймактык тескөөчү үчүн курулган үйдүн ачылыш аземи болду. Бул тууралуу айыл өкмөт башчысы Алчынбай Төралиев Sputnik Кыргызстан агенттигине билдирди.
Маалыматка ылайык, буга чейин имарат жоктугунан милициянын №31 таяныч пунктунун тескөөчүсү Чырмаш Үсөн уулу айылдагы мечитте жана жергиликтүү жашоочулардын үйлөрүндө үй-бүлөсү менен жашап келген.
Милиция пунктунун имарат маселесин чечүү максатында Ак-Турпак айыл өкмөтүнөн бир миллион сом, Кадамжай райондук милициясынан 200 миң сом бөлүнгөн. Демөөрчүлөрдү кошкондо жалпысынан 1,5 миллион сом чогулган. Ага 3,5 сотых жерге төрт бөлмөдөн турган имарат курулган. Анын үч бөлмөсү Миң-Чынар айылын тейлеген аймактык тескөөчү, милициянын капитаны Чырмаш Үсөн уулунун үй-бүлөсү үчүн болсо, бир бөлмөсү кызматтык бөлмө катары колдонулат.
Облустук милициянын маалымат кызматы билдиргендей, Бүргөндү айылдык милиция пункту 26 миң адамды, Ак-Турпак, Кыргыз-Кыштак жана Совет айыл өкмөттөрүн тейлейт. Ак-Турпактагы бул таяныч пункту айылдык милиция бөлүмчөсүнөн 20-25 чакырым алыста жайгашкан.
Беш миңден ашуун эл жашаган Миң-Чынар айылында мал уурулук боюна факты көп катталат. Жыл башынан бери мындай жети факты катталып, 18 баш мал уурдалган. Алардын баарынын бети ачылган.