БИШКЕК, 9-июл. — Sputnik. Жалал-Абад облусунун Сузак районунда 11 жаштагы инисин бычактап өлтүрүүгө шектелген 14 жаштагы кыз тергөө учурунда туугандары менен жашоодон баш тартты. Бул тууралуу Эмгек жана социалдык өнүктүрүү министрлигинен билдиришти.
Маалыматка караганда, аны реабилитациялык борборго жайгаштыруу маселеси каралып жатат. Ал жактан кызга психологиялык жана укуктук жардам берилет.
Демилгени Сузак райондук Эмгек жана социалдык өнүктүрүү башкармалыгы өкмөттүн Жалал-Абаддагы ыйгарым укуктуу өкүлү менен биргеликте көтөрүүдө.
"Бул маселени талкуулоо үчүн кыздын туугандары чакырылган. Бирок өспүрүм тергөө учурунда туугандары менен жашоодон баш тарта тургандыгын билдирди", — дешти министрликтен.
Эске салсак, Сузак районунун Барпы айыл өкмөтүндөгү Каңды айылында 8-июль күнү саат 18:00дөр чамасында 11 жаштагы жеткинчек бала өз үйүндө бычакталганы кабарланган. Анын колу-буту скотчтолуп, бир нече жерине бычак сайылган. Сөөгү үйдүн кире беришинен табылган. Кийинчерээк "Балаң аркылуу өч алдым" деген кат табылган. Бирок тергөө учурунда баланын бир тууган эжеси инисин бычактап салганын моюндаган.