БИШКЕК, 8-июл. — Sputnik. Өнөр жай ишканаларын салуу үчүн салыктын бир нече түрүнөн бошотула турган аймактар аныкталды. Бул туурасында салык кызматынан билдиришти.
Белгилей кетсек, Кыргызстанда 2019-жылдын 1-январынан тарта жеңилдик берилген (преференциалдык) аймактарда жаңы өнөр жай ишканаларын ачуу үчүн жеңилдетилген салык каралган.
Ага ылайык, аймактарга өнөр жай ишканасын ачкандар сатуу салыгы, пайда салыгы, жер жана мүлк салыгын төлөөдөн бошотулат. Бул аймактарга жеңил жана тамак-аш өнөр жайы, электр энергетикасы, айыл чарба продукцияларын кайра иштетүү жана чогултуу ишканаларын, экспортко багытталган продукцияларды өндүргөн мекемелерди ачса болот. Жогорудагы жеңилдиктер калктуу пункттун чегинен тышкары жайгашкандарга берилбейт.
Жеңилдик берилген аймактардын тизмеси төмөндөгүдөй: Каракол, Балыкчы, Нарын, Кочкор, Токмок, Кара-Балта, Талас, Исфана, Баткен, Кадамжай, Өзгөн, Кара-Суу, Таш-Көмүр, Кара-Көл, Жалал-Абад, Кербен, Кочкор-Ата, Кызыл-Кыя, Сүлүктү, Майлуу-Суу, Ноокат, Айдаркен, Көк-Жаңгак, Токтогул, Чолпон-Ата, Шопоков, Кант, Орловка, Кемин, Кайыңды.