БИШКЕК, 3-июл. — Sputnik. Жогорку Кеңештин төрагасы Дастан Жумабеков Матраимовдордун үй-бүлөсүнө айтылган алкышка суктанарын айтты. Ал мындай пикирин 6-чакырылыштагы парламенттин 5-сессиясынын жыйынтыгы боюнча журналисттердин суроолоруна жооп берип жатып билдирди.
Жумабеков журналисттердин "эгер Матраимовдор кийин күнөөлүү деп табылып калса моралдык жоопкерчиликти сезесизби?" деген суроосуна жооп берди.
"Мен таза иштесем, мамлекет үчүн иштесем эч нерседен коркпошум керек. Ошого эрким жеткени үчүн төрагалыкка келдим", — деди ал.
Жумабеков ошондой эле, айткан сөздөрүнө жооп берерин, сот, укук коргоо органдары кылмыш болгонун далилдесе моралдык жоопкерчиликти алууга даяр экенин белгиледи.
Төрага ошондой эле бир тууган Матраимовдор 1-майда Кара-Суу районунда өткөргөн спорттук мелдешке депутат Искендер Матраимовдун чакыруусу менен барганына токтолду.
Белгилей кетсек, Матраимовдор 1-май күнү Кара-Суу районунда Жеңиш күнүнө жана атасы Исмаил Матраимовдун жаркын элесине арнап волейбол жана мини футбол боюнча турнир өткөргөн. Ага биринчи вице-премьер Кубатбек Боронов баштаган өкмөт мүчөлөрү жана төрага Дастан Жумабеков баш болгон депутаттардын жоон тобу катышкан. Айрым депутаттардын Райым Матраимов менен катарлаш отурган сүрөтү да тараган. Райондук бир иш-чарага бийлик төбөлдөрүнүн жоон тобунун барышы коомчулукту дүрбөлөңгө салып, түрдүү нааразычылыктарды жараткан.