БИШКЕК, 30-июн. — Sputnik. Президент Сооронбай Жээнбеков 30-июнда Чүй облусунун Жайыл районундагы Суусамыр өрөөнүндө Каба уулу Кожомкулдун 130 жылдыгына арналган майрамдык иш-чарага катышты. Бул тууралуу мамлекет башчынын маалымат кызматы билдирди.
Жээнбеков Кожомкул балбан кыргыз элин даӊазалаган өз заманынын залкар инсаны болгондугун белгиледи. Майрамдык иш-чаралардын алкагында улуттук спорттун түрлөрү боюнча мелдештер өткөрүлүп, концерттик программа менен коштолду.
Балбан эскерилип, күмбөзүнө барып куран түшүрүлдү. Андан кийин президент балбандын архивдик материалдары жана жеке буюмдары сакталган үй-музейине барган. Жээнбеков үй-музейге кыргыздардын тарыхын чагылдырган "Кыргыздар" китебинин томдорун, Чыӊгыз Айтматовдун чыгармалар топтомун жана улуу жазуучу менен Айкөл Манастын элеси түшүрүлгөн сүрөттөрдү белекке берди.