БИШКЕК, 27-июн. — Sputnik. Жогорку Кеӊештин "Кыргызстан" фракциясынын депутаты Урматбек Самаев Укук тартиби, кылмыштуулук менен күрөшүү жана коррупцияга каршы аракеттенүү боюнча комитеттин төрайымынын орун басары болуп шайланды. Бул тууралуу парламенттин маалымат кызматынан кабарлашты.
Анын бул орунга дайындалышына 86 эл өкүлү макулдугун берди.
Белгилей кетсек, Жогорку Кеӊештин аталган комитетинин төрайымы — Наталья Никитенко. Ал эми анын орун басары депутат Искендер Матраимов болчу.
Бул депутаттын аты чуулуу иштерге аралашкан жайы бар. Быйыл 26-январга караган түнү "Токмок" көзөмөл өткөрүү бекетинин жанында контрабандачылардын атышуусу болгон. Буга шектүү катары эки адамды камакка алуу чечими чыккан. Бирок экөө тең ок жегенин айтып ооруканага түшкөн. Алардын бири Дастан Бейшенкулов депутат Урмат Самаев менен тууганчылыгы бар экенин моюндаган.
Кийин бул иштин алкагында депутат Самаев Чүй ОИИБинде сурак берген.
Депутат тууралуу кененрээк билгиңиз келсе, Sputnik агенттигинин макаласын окуңуздар.