БИШКЕК, 19-июн. — Sputnik. Улуу Британиянын Кыргызстандагы мурдагы элчиси Робин Орд Смит өлкөнүн бизнес-акыйкатчысы болуп шайланды. Бул тууралуу Sputnik Кыргызстан агенттигине Бизнес ассоциация улуттук альянсынын төрагасы Сталбек Акматов билдирди.
Ал бул кызматка байкоочу кеңештин чечими менен келди. Кеңештин курамына бизнес ассоциациялар, өкмөттүн жана Европанын реконструкция жана өнүктүрүү банкынын өкүлдөрү кирген.
"Бардык мүчөлөр Смиттин талапкерлигин колдоду. Жыйынтыктоочу протоколдук документке премьер-министр кол коюп, бекитет", — деди ал.
Маалыматка караганда, бул кызматка жалпы жонунан 100 киши талапкерлигин көрсөткөн. Алардын ичинен экинчи турга бешөө өткөн:
— Нурлан Мусуралиев, Соода-өнөр жай палатасынын вице-президенти;
— Актилек Тунгатаров, "Кумтор Голд Компани" ишканасынын туруктуу өнүктүрүү боюнча мурдагы директору;
— Сергей Пономарев, Базар, соода ишканалары жана кызмат көрсөтүү ассоциацияларынын директору;
— Нурсулуу Ахметова, президенттик аппараттын финансы-экономикалык анализ жана өнүктүрүү мониторинги бөлүмүнүн мурдагы жетекчиси;
— Робин Орд Смит, Улуу Британиянын Кыргызстандагы мурдагы элчиси.
Үстүбүздөгү жылдын башында Кыргызстандын премьер-министри Мухаммедкалый Абылгазиев бизнес-акыйкатчы институтун түзүү боюнча токтомго кол койгон. Аталган мекеме ишкерлик менен алектенген тараптардын укугун, эркиндигин жана мыйзамдуу кызыкчылыктарын коргойт.
Катчылыктын штаты такталган эмес. Бизнес-акыйкатчы институтун ишке киргизүү үчүн 1,5 миллион евро сарпталат. Каражат Европанын реконструкция жана өнүктүрүү банкы тарабынан бөлүнмөкчү.
Бизнес-акыйкатчы беш жылга шайланат жана бир эле адам эки мөөнөттөн ашык бул орунда кала албайт.