БИШКЕК, 15-июн. — Sputnik. Өлкөнүн мурунку башкы прокурору Аида Салянова Улуттук кардиология жана терапия борборуна жаткырылганын жактоочусу Рабига Сыдыкова тастыктады.
Белгилей кетсек, буга чейин Жаза аткаруу мамлекеттик кызматы кримтөбөл Азиз Батукаевдин мыйзамсыз бошотулушу боюнча жанданган кылмыш ишинин алкагында №1 тергөө абагына камакка алынган Аида Салянова аталган ооруканага алып келингенин билдирген.
"Консилиум Салянова дарыгерлердин көзөмөлүндө болушу керек деген чечим чыгарды. ЖАМКка Саламаттык сактоо министрлигинен кат келди", — дешти кызматтан.
Мурунку башкы прокурор ЖАМК кызматкерлеринин кайтаруусунда болот.
Эскерте кетсек, Батукаевдин иши боюнча Саляновадан тыш да бир нече медик менен аткаминер кармалган. Алардын кээси үй камагына чыгарылса, айрымы камакта. Ал эми ошол кезде ЖАМКты жетектеген Зарылбек Рысалиев оор абалда ооруканада жатат.