БИШКЕК, 10-июн. — Sputnik. Евразия экономикалык комиссия (ЕЭК) коллегиясынын мүчөсү (министр) болуп Кыргызстандын атынан Нурлан Акматов дайындалды. Бул туурасында Евразия экономикалык биримдиктин (ЕАЭБ) маалымат кызматы билдирди.
Нурлан Акматов Кыргызстандын Бажы кызматына 1995-жылы катардагы инспектор катары жумушка орношуп, Мамлекеттик бажы комитетинин төрагалыгына чейин жеткен. 2011-2018-жылдары Кыргызстандагы ири ишканалардын бири "Газпромнефть Азиянын" жетекчисинин орун басары болуп иштеген. 2018-жылдан ушул күнгө чейин "Манас" эл аралык аэропорту" ААКнын башкаруучулугунун төрагасы болгон.
Акматовдун эки жогорку билими бар. 1993-жылы Скрябин атындагы Айыл чарба институтун экономика адистиги боюнча аяктаган, ал эми 1998-жылы Кыргыз улуттук университетинин юридикалык факультетин бүтүргөн.