БИШКЕК, 4-июн. — Sputnik. Кыргызстан менен Палестинанын футбол боюнча курама командаларынын беттеши алдында күйөрмандар үчүн көңүл ачуу программасы тартууланат. Бул тууралуу КРдин Футбол федерациясынын маалымат кызматынан билдиришти.
Оюн 11-июнь күнү Дөлөн Өмүрзаков атындагы стадиондо болот. Башталышы 20:00.
Ал күнү стадиондун бир тарабында фанаттар аянтчасы ачылат. Анда стол үстүндө ойнолчу оюндар, сүрөткө түшүү аянты жана балдарга ойноочу жай уюштурулат.
Ошондой эле күйөрмандарды төмөнкү программа күтөт:
- ырчылардын жана диджейлердин номерлери;
- баалуу белектер коюлган сынактар;
- балдар үчүн футбол темасында мастер-класстар.
Оюн-зоок саат 18.00дө башталат. Билеттерди стадиондун кассасынан алууга болот.