БИШКЕК, 28-май — Sputnik. Парламент жыйындарында депутаттар каяша айтканда өзүмдү токтоо кармоого аракет кылам. Бул тууралуу Жогорку Кеңештин төрагасы Дастан Жумабеков Sputnik Кыргызстан радиосунда куруп жаткан маеги учурунда айтты.
"Парламенттин табияты ушундай, өлкө тагдыры үчүн депутаттар талашып-тартышып, кер-мур айтышат. Мен муну түшүнүү менен кабыл алам. Анүстүнө ар бир адамдын өз кыялы бар дегендей. Бирок кайсы бир чекке жеткирип койгондо байкабастан ар кандай сөздөр чыгып кетиши мүмкүн. Андай учурда мен өзүмдү колдон келишинче токтоо кармоого аракет кылам", — деди төрага.
Эске салсак, буга чейин парламент төрагасы менен депутат Алтынбек Сулайманов жыйын учурунда айтыша кеткен. Эл өкүлү Жумабековдун регламентти бузуп жатканын айтып, спикердин жообуна "Дастан Артисбекович, кыйкырбаңыз. Мага кыйкырганга али чоңоё элексиз, жаш баласыз, кечирип коюңуз. Сиздин үнүңүз мага жетпейт" дегенге чейин барган.