БИШКЕК, 23-май — Sputnik. Жогорку Кеңештин депутаты, вице-спикер Мирлан Бакиров Кыргызстанга көчүрүлүп келген Памир кыргыздары каралбай калды деген маанайда акыркы учурда маалыматтар тарап жатканын айтып, өкмөттү алардын маселесине көңүл бурууга чакырды.
"Өкмөт колунан келишинче шарт түзүп, жардам берип жатат. Бирок акыркы күндөрү ошонун (Памир кыргыздары — ред.) тегерегинде бир топ маселе пайда болду. Алардын айрымдары кайта кайтабыз десе, айрымдары шарт керек деп жатыптыр", — деди ал.
Бакиров, андан сырткары, Памирден келген кыргыздардын жашоо-тиричилиги мал-жандык менен байланышкандыктан, Алай сыяктуу тоолуу аймактардан атайын айыл куруп, ошол жакка отурукташтырса жакшы болмок деген сунушун айтты.
Эске салсак, 2017-жылдын октябрь айында Памирде жашаган 33 этникалык кыргыз тарыхый мекенине өкмөт тарабынан көчүрүлүп келип, Куланак айылына отурукташкан. Кийин 2018-жылы жазга жуук дагы бир нече адам келген.
Ал эми 6-июлда 18 киши жайкы каникулга карата Бишкектен Памирди көздөй сапар алышкан.