БИШКЕК, 21-май — Sputnik. Премьер-министр Мухаммедкалый Абылгазиев "Коопсуз шаар" долбоорун ишке ашыруу маселеси боюнча кеңешме өткөрүп, анда айып пулдарды азайтуу маселесин изилдеп чыгуу боюнча жумушчу топ түзүүнү тапшырды. Бул тууралуу өкмөттүн маалымат кызматы билдирди.
Белгилей кетсек, айып пулдардын көлөмү элдин социалдык абалын эске албай туруп белгиленип калганын Жогорку Кеңештин депутаттары буга чейин бир нече ирет айтышкан.
"Коомчулуктун пикирин эске алып, ошондой эле Жогорку Кеңештин депутаттарынын демилгесин көңүлгө алуу менен Абылгазиев жумушчу топко учурдагы айып пулдардын өлчөмүнүн негиздүүлүгүн жана натыйжалуулугун карап чыгууну тапшырды", — деп айтылат маалыматта.
"Коопсуз шаар" долбоору ишке аша баштагандан бери жалпысынан жол эрежесинин бузулушу боюнча 108 137 токтом түзүлгөн, анын 44,5 пайызы төлөнгөн.