Айсулуу Тыныбекова 26-апрелде Кытайдын Сиань шаарында өткөн Азия чемпионатында алтын байге уткан. Аны Бишкекке келгенде күйөрмандар менен активисттер салтанат менен тосуп алышкан. Кечээ, 30-апрель күнү, эртең менен журналисттер үчүн маалымат жыйын куруп, кечке жуук спорттук залдардын биринде журналисттер үчүн кантип машыгарын көрсөттү.
Тыныбекова Кыргызстандагы балбан кыздардын сап башында турат. Азиянын үч жолку чемпиону. Ал 2016-жылы Бангкокто жана 2017-жылы Индияда өткөн Азия чемпионатында алтын медаль тагынган болчу. Рио-де-Жанейродо өткөн Олимпиадада бешинчи орунду алган. Ошондой эле Азия оюндары жана Ислам тилектештиги оюндарында чемпиондукту багындырган. 2017-жылы Дүйнө чемпионатынан коло алган. Мындан сырткары, күмүш, коло медалдарды бир нече ирет уткан. КРдин эмгек сиңирген спортчусу, "Даңк" медалынын ээси.