БИШКЕК, 29-апр. — Sputnik. "Электр станциялары" ААКтын маалымат катчысы Тагжана Айдаралиева Бишкекте ысык суунун өчүрүлүшү боюнча түшүндүрмө берди.
Буга чейин мэрия борбор калаада ысык суу 6-майдан 6-июнга чейин өчүрүлөрүн билдирген. Алдын ала маалымат боюнча дал ушул күнү орозо башталат. Былтыр 21-майда ысык суу берүү убактылуу токтотулган. Анда соцтармактын колдонуучулары орозо айында суунун өчүрүлүшүнө нааразы болушкан.
Айдаралиеванын айтымында, суу өчкөн маалда күн куйкалабай, салкын болот.
"Май айы — жылуулук пунктуларынын ичин оңдоого абдан ыңгайлуу учур. Күн ысып кетсе, ал жакта иштөө өтө оор. Жылуулук трассаларын жана жабдууларды карап чыккандан кийин тийиштүү иштердин көлөмү аныкталат. Ушул мониторингдин натыйжасында иштер жүргүзүлөт", — деди ал.
"Бул иштер менен кийинки жылуулук сезонуна даярдык көрөбүз. Октябрь айына чейин уланат, мөөнөттү өзгөртүү мүмкүн эмес, анткени бул технологиялык процесс. "Бишкекжылуулуктармагы" кышкы суукта бардык жабдуу так иштеши үчүн болгон аракетин көрүүдө", — деди маалымат катчы.
Анын айтымында, ысык суунун өчүрүлүшү пландык иш-чаралардын графиги менен гана байланыштуу, Орозо айына эч кандай тиешеси жок.