БИШКЕК, 19-апр. — Sputnik. 11-апрелде Ат-Башы суусуна түшүп кеткен 5 жаштагы Барсбек Бектемировдун сөөгү табылганын Sputnik Кыргызстан агенттигине бөбөктүн туугандары билдирди.
Эскерте кетсек, жакындарынын, ӨКМ куткаруучуларынын Барсбекти издеп жатканына бүгүн 8 күн болду.
"Бала Васильевка айылынан табылды", — дешти жакындары.
ӨКМдин маалыматында бала 19-апрель күнү саат 12.15те Чүй дарыясынын Бирлик менен Гроздь айылдарынын ортосундагы бөлүгүнөн табылган. Бул Барсбек түшүп кеткен жерден 12-13 чакырым ылдый экени маалым болду.
Буга чейин Барсбектин кош бойлуу энесинин абалы начарлап, Саламаттык сактоо министрлиги адистерди жибергени айтылган.