БИШКЕК, 15-апр. — Sputnik. Кантта 12 жаштагы баланы уурдап кеткен фактыны тез арада класс жетекчисине кабарлап, кылмыштын бетин ачууга көмөктөшкөн мектеп окуучусу Малика Усманова сыйланды. Бул туурасында Чүй облустук милициясынын маалымат кызматы кабарлады.
Эске салсак, 11-апрель күнү Кант шаарында эртең менен 12 жаштагы Данил Браилкинди белгисиз адамдар уурдап кетип, ал кечки саат тогуздан өткөндөн кийин атайын операциянын аркасында табылган.
Бүгүн, 15-апрелде, Чүй облустук ички иштер башкармалыгы кылмышкерлердин изине түшүүгө жардамдашкан 6-класстын окуучусу Малика Усманованы сыйлады. Азем аталган шаарда №4 мектепте окуучулардын, мугалимдердин катышуусунда өттү.
Облустук милициянын курамынын атынан алкыш айтылып, кызга грамота жана белек тапшырылды.
"Мындай учурлар өзгөчө мактоого арзыйт. Өспүрүмдөр жасаган эрдиктер, каарман иштерди коомго айтып-деп, маалымдап туруу зарыл. Өсүп келе жаткан муун тартиптүү жана үлгү боло турган мисалдар менен чоңойгону кажет", — деди облустук милициянын жетекчиси Самат Курманкулов.
12 жаштагы баланын уурдалышы республика ичинде чагылгандай тарап, милиция кызматкерлери эле эмес, ыктыярчылардан түзүлгөн топ да издей баштаган. 11-апрель күнү эртең менен саат сегиздерде болгон бул окуя ошол эле күнү кечки саат тогуздардан өтүп, жакшы кабар менен аяктады. Канттык баланы криминалдык милициянын кызаматкерлери жана атайын даярдыктагы аскерлер Бишкектин түштүк жагындагы Панорама аймагындагы гараждын жер төлөсүнөн таап чыккан.
Уурдалган Данилдин атасы окуя тууралуу Sputnik Кыргызстандын журналисттерине айтып берди.