БИШКЕК, 9-апр.— Sputnik. Кыргыз мамлекеттик медициналык академиясынын студенттеринен турган "Ак кеме" командасы практикалык-медициналык даярдык боюнча россиялык VII "Золотой Медскилл" олимпиадасында "Креативдүү ой жүгүртүү" номинациясын жеңип алышты. Бул тууралуу окуу жайдын маалымат кызматы кабарлады.
Команданын курамына медициналык академиянын 5-6- курсунда окуган студенттер кирген. Москвада өткөн акыл таймашына ар кайсы өлкөдөн жалпы 55 команда катышкан.
"Беш сааттын ичинде командалар бир станциядан экинчи станцияга барып, ар кандай кырдаал боюнча тапшырмаларды аткарышты", — деп жазылат маалыматта.
Мындан сырткары, студенттер алты окутуучу мастер-класстан да өтүшкөн.