БИШКЕК, 9-апр. — Sputnik. Кыргызстанга жакынкы күндөрү кайтып келем деп билдирди саясатчы, "Республика — Ата Журт" партиясынын лидери Өмүрбек Бабанов НТС каналына маек берип жатып.
"Кайсыл жерде болбоюн мекендештерим менен жакшы көрүшөбүз. Алар менен жолукканда келеримди айткам. Бир тобу качып кетти деп айтып жатат. Ага жообум бар. Кыргызстанга жакынкы күндөрү кайтып келем", — деди Бабанов.
Эске салсак, "Республика — Ата Журт" фракциясынын экс-лидери Өмүрбек Бабанов 21-мартта өзүнүн Facebook баракчасына жакында Кыргызстанга келем деген маанайда кайрылуу жасаган.
Бабанов Кыргызстанга келет деген сөздөн кийин УКМК билдирүү тараткан.
Улуттук коопсуздук мамлекеттик комитетинин расмий өкүлү Рахат Сулайманов эгер Өмүрбек Бабанов Кыргызстанга келе турган болсо "мыйзам боюнча жоопко тартыла турганын" Sputnik Кыргызстан агенттигинин кабарчысына билдирген.
Белгилей кетсек, Башкы прокуратура Өмүрбек Бабановго карата Конституциялык түзүлүштү күчкө салып өзгөртүүгө чакырык жасады жана улуттук (этностор аралык), расалык, диний же регион аралык кастыкты козутту деген кине менен 2017-жылы 4-ноябрда кылмыш ишин козгогон.
Ал эми 2018-жылы сентябрда Улуттук коопсуздук мамлекеттик комитети мурдагы депутат Өмүрбек Бабановго карата бийликти күч менен басып алуу, массалык башаламандык уюштуруу боюнча козголгон кылмыш ишинин тергөө процесси токтотулганын билдирген.