БИШКЕК, 8-апр. — Sputnik. Президент Сооронбай Жээнбеков UFC боюнча дүйнө чемпиону Валентина Шевченкону кабыл алды. Бул туурасында өлкө башчынын маалымат кызматынан билдиришти.
Жолугушууда мамлекет башчысы Шевченкону чемпиондук курду жеңип алышы менен куттуктап, "Даңк" ордени менен сыйлаган. Ал эми машыктыруучусу Павел Федотовго спортчуларды даярдоо чеберчилигинин эң жогорку деңгээлдеги машыктыруучулук таланты үчүн ыраазычылык билдирип "Кыргыз Республикасынын дене тарбиясына жана спортуна эмгек сиңирген кызматкер" ардактуу наамын ыйгарган. "Кулатуу эр таймаш ММА" Дүйнөлүк федерациясынын президенти Руслан Кыдырмышев жана спортчунун апасы Елена Шевченко энчилүү сааттар менен сыйланды.
"Бүт өлкө, биздин жүз миңдеген жарандар сиздин спорттук ийгиликтериңизге тынымсыз байкоо салып, жалындуу күйөрман болушууда. Таза жана татаал күрөштө жеңген медалдарыңар биздин көп улуттуу өлкө үчүн өзгөчө баалуу. Мунун артында көп жылдык эмгек турат. Алдыга коюлган милдетти аткардыңар, Кыргызстаныбыздын намысын коргодуңар. Келечекте мындан да чоң ийиликтерге жетишип, бүт дүйнөгө спорттогу эң мыкты жетишкендиктерди көрсөтөсүз деген ишенимдебиз!" — деп айткан Жээнбеков.
Валентина Шевченко президентке жана бардык кыргызстандыктарга колдоосу жана жылуу тосуп алганы үчүн ыраазычылык билдирип, бул ага кайда гана болбосун ар дайым күч-кубат жана жеңишке ишеним берип турарын белгилеген.
Коноктор да мамлекет башчысына символикалуу белектерди тапшырды.