БИШКЕК, 5-апр. — Sputnik. Эмгек жана социалдык өнүктүрүү министри Улукбек Кочкоров өкмөттүн жыйынында электр энергиясына болгон баа маселесин көтөрдү.
Аткаминер калк үчүн 700 киловатт-сааттык чек бар экенин, ар бир кв/с 77 тыйындан төлөнөрүн белгилеп, андан ашып кетсе баа 2 сом 16 тыйынга чыгарын эске салды. Кочкоров кечээ Баткенде болуп, жердин тартыштыгынан 60-жылдары төрөлгөн жарандардын жер тилкеси жок экенине токтолду.
"Бир тилкеде төрт-бештен үй-бүлө жашайт, бул дээрлик 30 кишинин тегерегинде. Анан аларга 700 киловаттык чек белгиленген. Бишкекте жалгыз жашаган карыянын деле чеги ошончо. Бул социалдык теңчиликке жатпайт", — деди министр.
Ал эми Улуттук энергетикалык холдингдин жетекчиси Азамат Абдыкадыров бул жерде эки маселе бар экенин айтты. Биринчиси — тариф боюнча Отун-энергетикалык комплексин жөнгө салуу боюнча мамлекеттик агенттикке кайрылуу керек. Холдингдин жетекчиси жашоочулардын көбү квартирант болушу мүмкүн экенин божомолдоду.
Мындай жоопко Кочкоров макул болгон жок.
"Бул жерде маселе квартирант же туруктуу жашоочу экенинде эмес. 30 кишинин баары бир үй-бүлөнүн мүчөлөрү. Жердин тартыштыгынан бөлүнүп кете алышпайт. Ал эми Бишкекте бир киши деле 700 киловатт-сааттык чекти пайдалана берет. Эл туура суроо коюп жатат деп ойлойм", — деди министр.
Абдыкадыров бул маселени эсептегичтерди карап чечүү керектигин белгиледи.
Маселе талкууланып, чечилүүгө тийиш экенин премьер-министр Мухаммедкалый Абылгазиев да туура көрдү.