БИШКЕК, 5-апр. — Sputnik. Ысык-Көлдө жол кырсыгынан бир үй-бүлө каза тапты. Бул тууралуу облустук милициянын маалымат кызматынан кабарлашты.
Окуя жумага караган түнү саат 00.30да болду. Бактуу-Долоноту айылына жакын жерде Volkswagen Golf 3 жана Toyota Ist унаалары кагышкан. Алдын ала маалыматтарга караганда, Volkswagen автосунун 42 жаштагы айдоочусу чыгыштан батышты көздөй баратып, каршы тилкеде келе жаткан Toyota унаасы менен сүзүшкөн. Анын рулунда 56 жаштагы жаран болгон.
Volkswagen унаасынын айдоочусу, 41 жаштагы жубайы жана алардын беш, үч жаштагы уулдары кырсык болгон жерде көз жумду. Ал эми алты жаштагы кызы менен 37 жаштагы жүргүнчү Ысык-Көл райондук ооруканасына жеткирилди. Ошол эле ооруканага Toyota автокөлүгүнүн да бир жүргүнчүсү түштү.
Тиешелүү экспертизалар жасалып, иликтөө иштери жүрүп жатат.