БИШКЕК, 31-мар. — Sputnik. Улуу Британиянын эң кары адамы 111 жаштагы Боб Уэйтон узак өмүр сүрүүсүнүн сырын ачты. Бул тууралуу Sky News басылмасы жазды.
"Эл сыяктуу эле жашадым, көп тумоолодум, безгек болуп оорудум. 2-3 жолу операция жасаткам. Эң негизгиси, жашоону сүйчүмүн. Оору, тоскоолдук деген нерселерге оңой менен баш ийбей келдим", — деди Уэйтон.
Мындан тышкары, ал туура тамактануу жана сүйүктүү иш менен алектенүү жакшы жардам берерин кошумчалады.
"Көбүнчө ар кандай ботколорду жейм. Мугалим, инженер болуп иштедим. Азыр жыгачтан буюм-тайым жасаган чакан өнөрканам бар. Майда-чүйдөлөрдү жасап сатам, өз кардарларым бар", — деди карыя.
Анын эки уулу, бир кызы, тогуз небереси жана 25 чөбөрөсү бар. Бирок дүкөнгө өзү барып келет. Өз оокатына өзү тың, эч кимден көз каранды болгусу келбейт.