БИШКЕК, 28-мар. — Sputnik. Россиянын президенти Владимир Путин брифингдин жүрүшүндө кыргызстандык жарандарга берилген миграциялык амнистия боюнча да кеп кылды.
Ал көптөгөн кыргызстандыктар техникалык себептерден улам кара тизмеге түшүп калганын белгилеп өттү.
"Кыргызстан тараптын суранычы менен мунапыс мөөнөтүн апрелдин соңуна чейин узарттык. Бул биздин өлкө менен болгон өзгөчө мүнөздөгү мамилени дагы бир ирет айгинелейт", — деди Путин.
Мындай миграциялык мунапыс Россиянын президенти Владимир Путиндин Кыргызстанга боло турган мамлекеттик сапарынын алкагында жарыяланган.
Россиянын аймагында миграция мыйзамдарын бузуп жүргөн КР жарандары 22-апрелге чейин Россиянын чегинен тоскоолдуксуз чыгып жана каалаган мезгилде административдик жоопкерчиликке тартылбай, ошондой эле "кара тизмеге" түшпөй, кайра Россияга кире алышат.