БИШКЕК, 28-мар. — Sputnik. Кош бойлуу кезинде бир аптада эки-үч жолу түнкү сменде иштөө түйүлдүктүн бойдон түшүп калуу кооптуулугун күчөтөт. Бул тууралуу Occupational & Environmental Medicine басылмасы жазды.
Мындай жыйынтыкка 22 774 келинге көз салган даниялык окумуштуулар келген. Бойдон көбүнесе сегизинчи жумадан кийин түшүп калары айтылат.
Иликтөөнү окумуштуу Луиз Мойленберг Бегтруптун жетекчилиги алдында илимпоздордун тобу 2007-жылдан 2013-жылга чейин өткөргөн. Кош бойлуулуктун 3-21 аптасында жүргөн аялдардын 44 пайызы жумасына бир жолу түнү менен иштеген. Мында 1889 аялдын боюнан түшүп калган. Окумуштуулар кош бойлуулуктун сегизинчи аптасынан кийин бойдон түшүү коркунучу күчөй турганын аныкташкан. Түйүлдүк чоңойгон сайын кооптуулук өскөн. Бул негизинен 26-30 жаштагы келиндерде көп байкалган.
Макаланын авторлору кош бойлуулуктун адепки маалында түнкү сменде иштөө түйүлдүктүн түшүп калышын шарттай турганын айтышты. Кейиштүү кесепеттин алдын алуу үчүн аял боюна бүткөн мезгилден тарта иш графигине тыкыр көз салып туруусу керек. Көзөмөлдү жумуш берүүчү, ошондой эле аялды караган гинеколог да жүргүзгөнү жакшы болору айтылды.