Sputnik Кыргызстан агенттигинин кабарчысы депутат Тазабек Икрамовго "Билим берүүнүн мыктысы" төш белгиси кайсы ишмердүүлүгү үчүн берилгенин билим берүү жана илим министри Гүлмира Кудайбердиеванын өзүнөн сурап жаткан. Ошол учурда Икрамов өзү да келип калды.
Sputnik Кыргызстан агенттиги Икрамовго берилген сыйлык жана башка маселелер боюнча министрге кайрылып, бир айдан бери жооп ала албай жүргөн. Кабарчы Кудайбердиеванын иш бөлмөсүнө барганда кире албай, эшиктин алдында күткөн. Үч жолу барса да майнап чыккан эмес. Маалымат катчысы "министр бул суроого жооп бербейт" деп орун басарларына кайрылууну сунуштаган.
Мындан улам кабарчы Кудайбердиевадан бүгүн, 18-мартта, Жогорку Кеңешке тармактык комитеттин жыйынына барганда жооп алууга аракет кылды.
"Министрликтин алдында статс-катчы башында турган комиссия бар. Ошол жакта каралыптыр. Жогорку Кеңештин тармактык комитетинин сунуштамасы болгон. Сыйлыктар көп болот, мага комиссия чыгарган протоколун алып келет, мен кол коём", — деди министр.
Бирок Кудайбердиева депутаттын билим берүүгө кошкон кайсы эмгеги үчүн сыйлык берүүгө кол койгонун так айта алган жок. Бул суроого жоопту толугу менен кийинчерээк бере турганын айтты.
Тазабек Икрамов Жогорку Кеңештин Социалдык маселелер, билим берүү, илим, маданият жана саламаттык сактоо боюнча комитетинин төрайымынын орун басары. Бул комитеттин төрайымы Гүлкан Молдобекова министрликке тек гана сунуш берилгенин жана комиссияга басым жасалбаганын билдирди.
Коопсуздук кеңешинин жумушчу тобунун мүчөсү Кайрат Осмоналиев да сындап чыккан. Ал аталган кеңештин катчысы Дамир Сагынбаевге эл өкүлүнө сыйлык мыйзамсыз берилгени жана аны кайтарып алуу керектиги боюнча кат жолдогонун билдирген.
Бирок көп өтпөй эле Осмоналиев өзү сындап жаткан министрге кеңешчи болуп дайындалды. Эми ал билим берүү тармагындагы коррупция менен күрөшүү боюнча иш алып барат.
Sputnik Кыргызстан агенттиги буга чейин 30-40 жылдык өмүрүн мектепке арнап "Билим берүүнүн мыктысы" төш белгисин ала албай жүргөн мугалимдер боюнча материал даярдаган.