БИШКЕК, 12-мар. — Sputnik. Легендарлуу футболчу, азыркы мыкты машыктыруучулардын бири Зинедин Зидан кайрадан испаниялык "Реал Мадрид" клубунун машыктыруучусу болду. Бул маалымат клубдун расмий сайтында маалымдалды.
Келишим 2022-жылдын 30-июнуна чейин түзүлгөн. ЖМКлар клубдун президенти Флорентино Перес машыктыруучуга командага толук көзөмөл кылып, оюнчуларды кабыл алуу боюнча маселелерди ага өткөрүп берерин жазды.
Былтыр жайында Зидан өзүнүн каалоосу менен аталган команданын машыктыруучулугунан кеткен. Ошол эле учурда атактуу футболчу, португалиялык Криштиану Роналду да команда менен коштошкон.
Футбол боюнча чеберчиликти үйрөтүү үчүн келген Хулен Лопетеги көпкө кармалган жок. Андан кийин команда жаңы машыктыруучу аргентиналык Сантьяго Солари менен иштеше баштап, бирок ал бүгүн кызматынан бошоду. Анын себеби - иштин майнабы болгон жок деп айтылды.
Эми көптөргө үмүт жаратып, Зидан кайрадан команданы алдыга сүрөмөй болду.