Бишкек. 10-мар. — Sputnik. Кыргызстандык ММА мушкери Барчынай Узгенбаева Queen Fighter of the World аталышындагы спортчу кыздардын эл аралык сулуулук сынагына катышууда. Бул туурасында маалыматты Sputnik Кыргызстан маалымат агенттигине спортчу өзү билдирди.
Ошондой эле уюштуруучу тарап дагы Кыргызстандын атынан Барчынай Узгенбаева катыша турганын Instagram баракчасы аркылуу билдирген.
Уюштуруучулардын билдиришинче, Queen Fighter of the World эл аралык сынагы алгачкы ирет өткөрүлүп жатат. Финалы 2-6-апрель күндөрү Крымдагы Ялта шаарында болмокчу.
"Бул конкурска спорттун жеке кармаштарын аркалап, ийгиликке жетишкен мушкер кыздар катыша алат. Сынак эл аралык спорт күнүнө карата өткөрүлүүдө", — деп жазылган Instagram баракчада.
Барчынай Узгенбаева Sputnik агенттигине учурда сынактын экинчи туру өтүп жатканын айтып берди. Ага катышуу үчүн 30 мамлекеттин спортчусу Чеченстанга учуп барган.
"Конкурстун биринчи бөлүгүндө кыздар уюштуруучулар аркылуу тандалды. Азыр экинчи турунда катышуучулар сүрөт, видеого түшөт, ошондой эле аскердик чеберчилигин көрсөтөт. Маселен, кечээ ок аттык. Үчүнчү турунда катышуучуларга интернет аркылуу добуш беришет. Андан өтсөк, финалда кадимкидей сахнада көйнөк кийип, образдарды тартуулап, бийлеп, өнөр көрсөтөбүз" - деди Узгенбаева.
Ал кошумчалагандай, сынактын жеңүүчүсүнө Queen Figher of the World деген жазуусу бар чоң кур тагылат.
23 жаштагы Барчынай Узгенбаева грэпплинг боюнча Азиянын эки жолку чемпиону жана Дүйнө чемпионатынын коло медалынын ээси. Панкратион боюнча КРдин чемпиону, ММА боюнча профессионалдуу мушкер. Fighter KG клубунда, машыктыруучу Кенжебек Чекировдун кол астында тарбияланат. Каймана аты — Багира.
Барчынай Узгенбаеванын грэпплинг боюнча мастер-классын Sputnik Кыргызстан маалымат агенттиги тарткан видеодон көрсөңүз болот.
Ал эми мушкердин бала чагы, үй-бүлөсү, спорттук жолу тууралуу маек да даярдалган.