БИШКЕК, 6-мар. — Sputnik. Коомдук телеканалдын башкы директорун тандоо ачык-айрым өтүп, президенттин же Жогорку Кеңештин аппаратынан эч кандай басым болгон жок. Бул тууралуу КТРКнын Байкоочу кеңешинин төрагасы Жыпар Жекшеев журналисттерге билдирди.
Шайлоодо Жайнак Үсөн уулу Байкоочу кеңештин 15 мүчөсүнүн 13үнүн добушун алган. Ал буга чейин НТС телеканалын жетектеп келген.
Жекшеев Коомдук байкоочу кеңештин мүчөлөрү жең ичинен сүйлөшпөгөнүн жана бардыгы Үсөн уулунун башка талапкерлерден өзгөчөлүгүн белгилешкен.
"Шайлоо мурда болуп көрбөгөндөй ачык өттү, эч ким аралашкан жок. Байкоочу кеңештин мүчөлөрүнүн ар биринин өз пикири болгонуна карабай, бүгүн ишине абдан жоопкерчиликтүү мамиле жасап, өз бүтүмүн чыгарышты", — деди ал.
Жекшеев ошондой эле "Жогорку Кеңештин жана президенттин аппаратынан басым болгонбу?" деген суроого да жооп берди.
Ал ошондой эле КТРКнын азыркы башкы директору Илим Карыпбеков жакшы иштегенин жана телеканалдын Байкоочу кеңеши андан кем эмес иштеген кишини издешкенин айтты.
Жекшеев, андан сырткары, Карыпбеков 19-мартта кызматын тапшырып, Жайнак Үсөн уулу 20-мартка ишке киришерин белгиледи.
Башында КТРКнын башкы директору болууга 22 талапкер арыз берген. Маектешүүдөн кийин жети талапкер — Ибраим Нуракун уулу, Жайнак Үсөн уулу, Адил Турдукулов, Галина Байтерек, Сураган Босумбаев, Болотбек Тиллебаев жана Замирбек Казакбаев калган.