БИШКЕК, 1-мар. — Sputnik. Казакстан Кыргызстандан барган алма, картошка, курманы ташууга киргизген чектөөсүн алып салмай болду. Бул тууралуу өкмөттөн кабарлашты.
Эске салсак, Казакстан 19-февралдан тарта өзүнүн аймагына жогоруда аталган продукцияларды киргизүүгө убактылуу тыюу салган. Кийин көйгөйдү чечүү үчүн Абылгазиев Астанага делегация жиберери маалым болгон.
Натыйжада 28-февраль күнү Кыргызстандын вице-премьер-министри Жеңиш Разаков Казакстандын премьер-министринин орун басары менен ветеринария, фитосанитария жана суу-энергетика чөйрөсүндөгү маселелер боюнча сүйлөшүүлөрдү жүргүздү.
"Казак тарап Кыргызстандын Ветеринардык жана фитосанитардык коопсуздук мамлекеттик инспекциясынын нотификациялар боюнча маалыматын караган соң, картошка, алма жана курманы ташууга киргизилген чектөөнү алып салуу боюнча протоколго кол коюлду", — деп айтылат маалыматта.
Ошондой эле тараптар айланма Чүй-2 каналынын курулушу, ошондой эле Чу дарыясынын бассейниндеги сууну эсептөөнү автоматташтыруу боюнча өз ара түшүнүшүүгө жетишкен.
Сапардын жүрүшүндө Казакстандын премьер-министри Аскар Мамин вице-премьер-министр Жеңиш Разаков баштаган Кыргызстандын делегациясын кабыл алды.