БИШКЕК, 6-фев. — Sputnik. Түп районунун егери Жаныш Масеев Ак-Суу районундагы Ак-Чий айылынын тургундары үч бодо малын карышкырга жара тарттырып жиберип, мергенчилерге кайрылышканын айтты.
"Быйыл карышкыр жылдагыдан күч болууда. Бул өрөөнгө кар калың жаагандыктан, мергенчилер кардын үстүнөн жүргөн техниканы арендага алып, акыркы үч күндө эки карышкыр колго тийди. Андан соң жергиликтүү тургундар менен жырткычтардын изине түштүк. Жалпысынан 6 карышкыр атылды. Кайсы жерден арыз түшсө, ошол жакка баруудабыз",— деп билдирди ал.
Биотүрдүүлүктү сактоо жана өзгөчө корголуучу жаратылыш аймактары департаментинин Ысык-Көл облусу боюнча башкы адиси Төлөгөн Усембаев кышкы санактын эсеби боюнча быйыл аймакта 540 карышкыр катталганын айтат.
Өкмөттүн зыяндуу жырткычтарды жок кылуу боюнча токтомунун негизинде облуста жергиликтүү бийлик жана тийиштүү мекемелер кирген атайын комиссия түзүлгөн. Учурда бул иш боюнча облуста мергенчилерден 5 топ, мерген сүйүүчүлөрдөн 9 топ өздөрүнө тиешелүү аймакта иш алып барууда.
"Биздин департаментте сайлуу 12, сайсыз 7 мылтык бар. Алар ок-дары менен камсыз кылынат. Бир карышкырдын башы үчүн 6 миң сом, бир чөөгө 2 миң сом сыйлык акы төлөнөт. Териге бирка басылгандан кийин ал кайтарылып берилет. Былтыркы жылы 91 карышкырга 546 миң сом, 19 баш чөөгө 38 миң сом сыйлык акы төлөнгөн", — деп билдирди.
Усембаев былтыр облустун аймагында 112 баш карышкыр, 78 чөө, 2 бөлтүрүк атылганын маалымдады.