БИШКЕК, 24-янв. — Sputnik. Премьер-министр Мухаммедкалый Абылгазиев Азия кубогунан кайтып келген футбол боюнча курама команда менен күйөрмандардын "Ала-Тоо" аянтындагы жолугушуусунда сүйлөп жатканда эл "стадион" деп кыйкырды.
"Менимче стадион маселеси чечилет. Президент менен сүйлөштүм. Менимче, жакында жаңы стадион куруу боюнча чечим чыгат", — деди Абылгазиев.
Быйыл Кыргызстандын курама командасы тарыхта биринчи жолу Азия кубогунда ойноду. Тайпалык этапта кытайлыктар менен түштүккореялыктарга жеңилип, үчүнчү оюнда филиппиндиктерди 3:1 эсеби менен жеңген. Муну менен кыргызстандыктар өз тайпасында үчүнчү орунду алып, 1/8 финалга чыккан. Тилекке каршы, чейрек финалга өтө албай, БАЭге 2:3 эсебинде утулуп калган.
Борбор калаадагы стадиондун эскилиги жеткендиктен, жаңысын куруу боюнча маселе көптөн бери талкууланып келет.
Жаңы стадион тууралуу президент Жээнбеков бүгүн, 24-январда, улуттук курама команданын курамын кабыл алганда да айткан.