БИШКЕК, 9-янв. — Sputnik. Социалдык тармакта кафедеги тойго келген аял тамада уюштурган оюнга катышып жаткан жеринен жыгылып каза болду делген видео тарады. Окуя Баткендин Исфана шаарында болгонун жазышууда.
Аталган маалыматты Sputnik Кыргызстан агенттигине Баткен облустук милициянын маалымат кызматы тастыктап, бирок кырсык Сүлүктүдө болгонун билдирди.
"Окуя өткөн жылдын 28-декабрында Сүлүктү шаарындагы кафелердин биринде болгон. Ал жерде той өтүп жаткан, саат 20.30дар чамасында өзүн жоготкон аялды ооруканага алып барышкан. Тилекке каршы, ал ошол күнү эле көз жумган. Мурда ооруп жүрчү экен, тойдо кан басымы көтөрүлүп кетиптир", — деп билдиришти милициядан.
Каза болгон аял Исфана шаарынын 51 жаштагы тургуну экенин айтышты. Бул факт боюнча милицияга арыз түшкөн эмес.