БИШКЕК, 27-дек. — Sputnik. Нарын облусунун Миң-Булак айылынын тургундары Солтон-Сары алтын кенине байланыштуу жыйын өткөрүүдө. Бул тууралуу Sputnik Кыргызстан агенттигине жергиликтүү тургун Саламат Зарылдык уулу билдирди.
Анын айтымында, жергиликтүү калк кытайлыктардын кенди иштетүүсүнө каршы болууда.
"Тообуз тоо бойдон, жайытыбыз жайыт бойдон калышын талап кылып жатабыз. Комбинат салууга өкмөт уруксат бериптир, кагазы бар экен. Ошол документтерди жокко чыгартуу үчүн жыйынга чогулдук. Бул алтын кенди иштетүү үчүн Кытайдын Zhong Ji Mining компаниясы лицензия алыптыр. Азыр жолун сала башташты, эмдиги жылы комбинат курулат деп жатышат. Бирок жергиликтүү тургундар аны курдурууга жол бербейбиз", — деди Зарылдык уулу.
Солтон-Сары кени Нарын облусундагы Капка-Таш тоосунун түндүк капталында жайгашып, деңиз деңгээлинен 3500-3600 метр бийиктикте жайгашкан. Алтын кен "Кыргызалтын" ААКсына карайт.