БИШКЕК, 26-дек. — Sputnik. Улуттук банктын төрагасы Толкунбек Абдыгуловдун менчигинде бир гана батир бар. Бул тууралуу аталган мекемеден билдиришти.
Эскерте кетсек, 25-декабрь күнү Жогорку Кеңештин депутаты Элвира Сурабалдиева Улуттук банктын төрагасы Толкунбек Абдыгуловдун ижарага берген бир нече үйү бар экенин айтып чыккан. Эл өкүлү банк жетекчиси бир гана батирим бар деп бир нече ирет айтып келгенин эскертти.
"Жогорку Кеңештин депутаты Сурабалдиевага таянуу менен Абдыгуловдун ижарага берилген квартиралары тууралуу ЖМКларга чыккан маалымат чындыкка дал келбейт", — дешти Улуттук банктан.
Тараткан билдирүүсүн тастыктоо үчүн аталган банк үч маалымдама тиркеген. Анда Абдыгуловдун да, үй-бүлө мүчөлөрүнүн да чогуу жашап жаткан үйүнөн башка турак жайы жок экени көрсөтүлгөн.
— Б.А.Е. аттуу Абдыгуловдун жубайына Кыргызстандын аймагында жайгашкан кыймылдуу же кыймылсыз мүлк катталбаганы тууралуу КМБМС тарабынан берилген маалымкат.
— А.Т.Т. аттуу Абдыгуловдун бойго жеткен баласына да Кыргызстандын аймагында жайгашкан кыймылдуу же кыймылсыз мүлк катталбаганы тууралуу КМБМС тарабынан берилген маалымкат.
Белгилей кетсек, 5,5 миллион сом өлчөмүндөгү ссуданы Абдыгулов 2015-жылдын июнь айында алган. 2017-жылдын сентябрында биринчи вице-премьер болуп дайындалып, бир аз убакыттан кийин Улуттук банктын төрагасы болуп кайтып келген. Банк системасынын жана өлкө экономикасынын өнүгүшүнө кошкон салымы үчүн, саясий жетекчи кызматына которулганы жана Улуттук банктагы 10 жылдык стажы үчүн 4 миллион 824 миң сому жоюлган.