Кыргызстандык мушкер Валентина Шевченкону азыр дүйнө эли таанып калды десек жаңылышпайбыз. Спортчу жакында эле Америкадагы беделдүү делген UFC уюмунун эң жеңил (57 кг) салмактагы чемпиондук наамына ээ болду.
Валентина Шевченко 1988-жылы 7-мартта Бишкек шаарында туулган. Энеси Елена Шевченко таэквондо боюнча кара курдун ээси, тайбокс боюнча машыктыруучу. Өзүнөн улуу эжеси Антонина да спортчу. Беш жашынан тарта азыркыга чейин машыктыруучу Павел Федотовдун колунда тарбияланып келет.
Федотов Валентинанын рингдеги тез, ыкчам кыймылы үчүн "Ок" деген лакап атты ыйгарган.
Спорттук команда 2005-жылдан тарта чет мамлекетте жашап, машыгуусун улантып келет. Алгач Россияда, андан кийин Перуда, учурда АКШда турушат. Ортодо көптөгөн мамлекеттерде машыгууда болушкан.
Валентина муайтай жана К1 боюнча 58 ирет профессионалдуу беттеш өткөрүп, анын бирөөсүндө гана утулган.
ММА боюнча профессионалдуу 16 мелдештин жеңүүчүсү.
2015-жылдан тарта UFC уюмунда ат салыша баштаган.