БИШКЕК, 14-дек. — Sputnik. Бишкек шаарына газ менен иштеген жаңы автобустарды кытайлык корпорация алып келет. Бул тууралуу мэриянын маалымат кызматынан кабарлашты.
Билдирүүгө ылайык, ал тендерге сегиз компания катышкан.
Буга чейин Бишкектин Жүргүнчү ташуучу автотранспорттук ишканасы 20-ноябарда газ менен иштеген 60 автобус алуу үчүн эл аралык тендер жарыялаганын билдирген. Ага өндүрүшчүлөр менен компаниялардын дилерлери катышып, өтүнмөлөр 11-декабрда ачылган. Коомдук транспортторду алып келүүнүн мөөнөтү — 2019-жылдын март айы. Ал үчүн калаа казынасынан 382 миллион 577 миң сом бөлүнгөн.
Мэриянын маалымат кызматы бүгүнкү күндө бир куб газ 19 сом 50 тыйын, дизель майы 46 сом 50 тыйын болуп жаткандыгын белгилеп, муну менен калаа бийлиги акчаны үнөмдөп, экологиялык коопсуздукка басым жасаларын айтат.
Ошондой эле жаңы унаалардын акчасы Кыргызстанга алынып келгенден кийин гана төлөнүп, алар тиешелүү документтерге кол коюлгандан 60 күндөн 90 күнгө чейин келе тургандыгы белгиленди. Бир автобустун баасы 72 миң долларды түзөт. Үнөмдөлгөн акчага ошол эле үлгүдөгү дагы тогуз автобус алууга мүмкүн. Жыйынтыгында шаарда жаңы 69 автобус жүргүнчүлөрдү ташып калат.