БИШКЕК, 6-дек. — Sputnik. Кыргызстанда Жогорку Кеңеш жана "Роза Отунбаеванын демилгеси" эл аралык коомдук фондусу жаңы жыл алдында "Балдарга жаңы жылга белек — акылдуу китеп" акциясын баштады. Бул туурасында аталган фондудан билдиришти.
Иш-чаранын максаты — коомчулуктун көңүлүн окуу маданиятын алга жылдырууга буруу, балдардын сөз байлыгын, ой жүгүртүүсүн калыптандырууда китептин баалуулугун көрсөтүү.
Алардын алгачкыларынан болуп, кечээ Жогорку Кеңештин депутаты Аида Касымалиева Ош шаарындагы №37 "Байчечекей" балдар бакчасында жана ушул эле күнү №17 мектеп гимназиясында балдарга китеп окуп берүү менен баштады.
Эл өкүлдөрү аталган фонд тарабынан даярдалып, жарык көргөн "Манас в рисунках", "Балдарга базарлык", "Тоо жаӊырткан чагылган", "Кыргызстанды кыдырабыз", "Ынтымак сыры", "Балерина", Мектепке саякат", "Биз мектепке барабыз" дагы башка бир катар китептерден окуп бермекчи.
Иш-чара жаңы жылга чейин республиканын бардык аймактарында өтөт.