БИШКЕК, 5-дек. — Sputnik. Ысык-Ата районуна караштуу Красная речка айылынын жолунан унаасын түртүп келе жаткан 18 жаштагы жигитти Mercedes-Benz үлгүсүндөгү машина коюп каза болгонун Чүй облустук милициясы билдирди.
Маалыматка ылайык, кырсык 3-декабрга караган түнү болжол менен саат 2.20ларда болгон. Чыгыштан батышты көздөй келе жаткан Mercedes-Benz ошол эле багытта унаасын түртүп келе жаткан уланды сүзүп, эч жардам көрсөтпөстөн из жашырып кеткен. Алган жаракатынан улам жигит Кант шаарындагы ооруканага жетпей жолдон үзүлгөн.
Милиция 4-декабрда кырсык болгон жерге түшүп калган фарадан улам унааны таап, ээсин аныктады. Дмитриевка айылынын 63 жаштагы тургуну кармалып, унаасы айып короого токтотулду.