БИШКЕК, 4-дек. — Sputnik. Биринчи вице-премьер Кубатбек Боронов Ысык-Көл облусуна барып, кырсыктан жабыркаган райондорду кыдырганын өкмөттүн маалымат кызматы билдирди.
Эскерте кетсек, 30-ноябрда жана 1-декабрга караган түнү аталган дубанда катуу шамал болуп, бир катар социалдык объектилердин чатырын учурган. Андан тышкары, зым карагайларды жабыркатып, бак-дарактар кулаган.
Кырсыктын кесепетин жоюу боюнча премьер-министр Мухаммедкалый Абылгазиев кеңешме өткөрүп, жабыркаган элге тийиштүү жардам көрсөтүү тапшырмасын берген.
Боронов Ысык-Көл районунда жараксыз болуп калган турак жайды көрдү. Үй ээлеринин айтымында, алар тамды камсыздандырууга жетишип, учурда аны калыбына келтирүү үчүн тийиштүү төлөмдөрдү күтүп жатат.
"Бул окуя көпчүлүк үчүн мисал болуп саналат, өзгөчө кырдаалдардан эч ким кепилденген эмес, бирок үй камсыздандырылган болсо, турак жайды калыбына келтирүүгө жана үйсүз калбоого мүмкүнчүлүк бар. Муну адамдар түшүнүүсү зарыл, ошондуктан калктын маалымдар болушу маанилүү роль ойнойт. Бүгүнкү күнү облус боюнча жабыркаган 300 үйдүн ичинен 14ү гана камсыздандырылган", — деп белгиледи биринчи вице-премьер.
Ага ылайык, бир катар объектилер боюнча жараксыз болуп калган курулуш материалдарын эске алуу менен аларды калыбына келтирүү боюнча чыгымдардын сметасын түзүү зарыл. Мындан тышкары, завод баасында шифер сатып алуу жана аны ӨКМ транспорту менен тийиштүү жерге жеткирүү маселелерин иштеп чыгуу милдеттендирилди.