БИШКЕК, 1-дек. — Sputnik. 2019-жылдан тарта машыктыруучулардын айлык акысы, спортчуларга берилчү стипендиянын көлөмү көтөрүлөт. Бул тууралуу премьер-министр Мухаммедкалый Абылгазиев Аргентинада өткөн Жаштар олимпиадасынан олжолуу кайткан кыргызстандык спортчуларды сыйлоо учурунда айтты.
Өкмөттүн маалымат кызматынын билдиргенине караганда жолугушуу бүгүн өткөн. Ага грек-рим күрөшү боюнча күмүш байгенин ээси Элмирбек Садыров, сууда сүзүү боюнча күмүш байге ээси Денис Петрашов, фехтование боюнча коло байгенин жеңүүчүсү Хасан Баудунов, ошондой эле алардын жеке машыктыруучулары катышты.
"Дүйнөлүк аренадагы жеңишиңиздер менен сыймыктанабыз. Бул ийгилик, албетте, талыкпаган эмгегиңиздердин натыйжасында келди. Таймаштар дүйнөлүк алдыңкы спортчулардын катышуусунда катаал шартта өттү. Сиздердин жыйынтыгыңыздар биз үчүн Оюндардагы жеңишке тете", — деди премьер-министр.
Абылгазиев спортчуларга ийгилик каалап, аларга жана машыктыруучуларга акчалай сертификаттарды тапшырды.