Басымдуу бөлүгү жаштар түзгөн кыргызстандыктар "Фиеста Сервис" жумушка орноштуруу компаниясы аркылуу ушул жылдын июнь айында Анталия провинциясынын Кемер шаарына барып, "Авангард" деген мейманканада иштеген.
Арызданган улан-кыздардын бири Бактыбек Рахатбек уулу иштеген мейманканасы 4-ноябрда эле жабылганын айтты. Андан бери 16 күн өтсө да айлык акы берилген эмес.
Миграция кызматына кайрылган Гүлмира Айдаралиева 20 жаштагы уулун 18-ноябрда жөнөткөн. Ал "Фиеста Сервис" компаниясынан тез арада баласын алып келип берүүнү талап кылууда.
"Балам студент, окуусунан суранып кеткен болчу. Эртең-бүрсүгүнү айылык берет экен деп жатып ушуга чейин созулуп кетти. 26сы тең үч айдан бери маяна да, билет да ала албай 16 күндөн бери жатышат. Анын арасында улан-кыздар, 30-40 жаштагы аялдар бар. Эгер бул маселе чечилбесе, прокуратурага дагы кайрылабыз", — деди Айдаралива.
Ошол учурда "Фиеста Сервис" компаниясынан жетекчиси Канат Чынботоев да келип калды. Ал кыргызстандыктар иштеген мейманкана банкротко учурагандыктан ушундай кырдаал жаралганын айтууда. Бирок ишембиге, тагыраагы 24-ноябрга чейин маяналары колуна тийип, Бишкекке келет деп убадалады.
Ошондой эле ал компания ар бир адамды жумушка орноштурууга 250 доллар кызмат акы аларын, бирок арызданып жаткандарды карызга жөнөткөнүн кошумчалады. Ал акчасын азыркыга чейин ала албай жүргөнүн айтты.
Чынботоевдин айтымында, "Фиеста Сервис" компаниясы былтыр ноябрь айында түптөлгөн.
Эскерте кетсек, Кыргызстанда жарандарды чет өлкөгө жумушка орноштуруу менен алектенген 75 жеке компания бар. Алар быйылкы жылдын алты айында 4649 адамды 14 өлкөгө жиберген.
Сизди чет өлкөгө жөнөткөн компания убадасынан тайып, келишимдеги шарттарды аткарбаса эмне кылуу керек?
— Сиз барган өлкөнүн ичиндеги Кыргызстандын элчилигине, консулдугуна кайрылыңыз.
— Мамлекеттик миграция кызматынын Маалыматтык-консультациялык борборунун сайтына электрондук арыз жөнөтүңүз.
Арызыңыз түшкөндөн кийин сизди жөнөткөн жеке компания бир жолу эскертүү алат. Экинчисинде ишмердүүлүгү токтотулуп, лицензиясынан ажыратылат. Ошондой эле 70 миң сомдук айып пул салынат.
Буга чейин алдамчылардын торуна түшүп, миграция азабын тарткан Түркиядагы кыргыз кыздарынын тагдыры тууралуу жазганбыз.