БИШКЕК, 19-ноя. — Sputnik. Кыргызстандын мурдагы президенти Алмазбек Атамбаев алгачкы байлыгын бийликке келгенге чейин эле тапканын "Апрель" телеканалына берген маегинде билдирди.
Ал өз сөзүндө 1989-жылы Кыргызстанда биринчилерден болуп жеке ишканасын ачканын, ошондой эле Түркия менен Россияда бизнеси болгонун белгиледи.
"1989-жылы мен Кыргызстанда биринчи жолу жеке ишкана ачтым. Башында китеп менен байыдым. Андан тапкан акчамды Кыргызстандагы ишканаларга салдым. Россия менен Түркияда бизнесим болгонун жашырбайм", — деди ал.
Атамбаев ошондой эле 2000-жылдары Аскар Акаевдин бийлиги ага кысым көрсөтүп, бизнесин тартып алууга аракеттер болгонун айтып, бир катар иштерин токтотууга аргасыз болгонун кошумчалады. Анын ичинде Түркиядагы бизнесин да сатууга мажбур болгонун белгиледи.
"Аны үч жыл башкардым. Жылына бир нече жолу кирешени бөлүштүрүп турчубуз. 2002-жылы мен алты жолу дивиденд алдым, анын суммасы 26 миллион долларга жакындады. Азыркы баа менен миллиарддан ашык доллар тапкам. Менин кирешимдин булагы ушул жакта", — деди ал.
Атамбаев ошондой эле учурунда анын "Форум" ишканасы "Кумтөр" ишканасындай эле салык төлөп келгенин кошумчалады.