БИШКЕК, 17-ноя. — Sputnik. Баткендин Лейлек районуна караштуу Жаңы-Жер айылдык кеңешинин төрагасы Кубаныч Баянов тийген октун кесепетинен айыга албай каза болду. Бул туурасында өздүк булактар билдиришти.
Маалыматка караганда ал бүгүн, 17-ноябрда, эртең менен саат 8.00дөр чамасында ооруканада көз жумган.
Белгилей кетсек, 6-ноябрга караган түнү Баяновду белгисиз адамдар үйүнүн жанынан атып кеткен. Кылмышкерлер ок чыгарып, из сууткан. Жарадар болгон эл өкүлүн туугандары Тажикстандагы Гафуров шаарындагы ооруканага жеткирген. Алган жараатынан улам жакшы боло албай ооруканада үзүлгөнү кабарланды.
Кубанычбек Баянов 32 жашта болчу, артында бир уул, бир кызы калды. Лейлек районунун акими Баймурат Бекмуратов анын сөөгү бүгүн саат 17.00дө кичи мекени Арка-2 айылында жерге бериле турганын билдирди.
Буга чейин окуя боюнча Кылмыш-жаза кодексинин 28-97-беренесинин (өлтүрүүгө аракет кылуу) негизинде кылмыш иши козголгону айтылган. Кылмышка шектүүлөр азырынча табыла элек.