БИШКЕК, 13-ноя. — Sputnik. Казакстанда "Вазар", "Нортиван" жана "ВазарН" дарыларын сатыктан алуу пландалып жатат. Дарыларды экспертизадан өткөрүү улуттук борбору бул препараттар зыяндуу экенин аныктаганын Sputnik Казакстан агенттиги жазды.
Өлкөнүн Саламаттык сактоо министрлиги үч ай мурда экспертиза боюнча улуттук борборунун текшерүүсүнөн улам курамында валсартан заты бар дарыларды сатыктан алган. Анткени бул дарылар онкологиялык ооруларды пайда кылары айтылган.
Курамында валсартан заты бар дарылар инфаркт менен инсульт ооруларынын алдын алуу үчүн кан басымы жогору бейтаптарга сунушталып келген.
Казакстандын Саламаттык сактоо министрлигинин фармация комитетинин төрайымы Людмила Бюрабекованын айтымында, бул дарыларды ичип жүргөндөр доктуру менен кеңешкенден кийин гана ташташы керек. Бейтаптар биринчи кезекте дарыгерге кайрылып, ага окшош дарыны алышы кажет.
Курамында валсартан заты бар дарыга дүйнөдө кандай карашат?
Бир катар эл аралык уюмдар курамында валсартан заты бар дарылардын сатылышына жол бербөө боюнча аракеттерди көрүшкөн. Алардын катарында Европанын дары-дармек боюнча агенттиги (ЕМА), Европанын дары-дармектин сапаты жана саламаттык сактоо боюнча директораты (EDQM), АКШнын азык-түлүктүн жана медикаменттердин санитардык сапатын көзөмөлдөө башкармалыгы (FDA) бар.