БИШКЕК, 6-ноя. — Sputnik. Бүгүн Бишкектин Свердлов райондук сотунда иттин өлүмү боюнча иш каралып, айыпталуучу жазага тартылды.
Соттун өкүмү менен итти уурдаган Темиркул Сатыбалдиев күнөөлүү деп табылып, үч жылга эркиндиги чектелип, 35 миң сом компенсация төлөө жана иттин каргысын кайтарып берүүгө милдеттендирилди. Эми ал үч күндүн ичинде Жаза аткаруу кызматына барып каттоого туруп, Бишкек шаарынан башка жакка чыгуунун жана жашаган жерин алмаштыруунун алдында укук коргоо органдарына кабарлап турушу кажет.
Белгилей кетсек, Гуля Алмамбетованын үй-бүлөсү алты жылдан бери багып келген Спайсик аттуу ити ушул жылдын июль айында жоголуп кеткен. Бул тууралуу жаныбардын ээси социалдык тармактагы баракчасына жарыялап, шаардыктардан жардам сураган. Август айында итти уурдады делген адамдын үйү табылгандан кийин Спайсиктин өлүп калганы маалымдалган. Мындан улам Алмамбетова сотко арыз жазган.
Доо ээси соттун өкүмү менен макул экенин айтып, иштин аягына чыгышына жардам бергендерге ыраазычылыгын билдирди.