БИШКЕК, 18-окт. — Sputnik. Экология жана техникалык коопсуздук боюнча мамлекеттик инспекциясынын кызматынан алынган маалымат катчысы Анара Мамбеталиева мурунку жумушуна кайра кайтып келмей болду. Бул боюнча буйрук чыкканын Sputnik Кыргызстан агенттигине өзү кабарлады.
Анын айтымында, Мамбеталиеваны мыйзамсыз жумуштан кетирген буйрук жокко чыгарылган.
"Менин коррупция менен күрөшүмдүн жыйынтыгы акырындык менен жемишин берип келе жатат, бирок толук түрдө эмес. Себеби инспекцияда коррупцияга тиешеси бар делген адамдар дагы деле иштөөдө", — деди Мамбеталиева.
Эске салсак, буга чейин Мамэкотехинспекциянын маалымат катчысы Анара Мамбеталиева аталган инспекция коррупциянын сазына батып бара жатканын өзүнүн Facebook социалдык тармагындагы баракчасына жазып чыккан. Ал чындыкты издеп жатып, кайра эч бир ишке орношо албай тургандай берене менен айдалганын билдирген. Мындан сырткары, Мамбеталиева "өмүрүм коркунучта" деп президент Сооронбай Жээнбековго кайрылган. Көп өтпөй өлкө башчы анын кайрылуусуна көңүл буруп, коррупциялык иштерди иликтеп чыгууну Коопсуздук кеңешине тапшырган.