БИШКЕК, 16-окт. — Sputnik. Жакынкы күндөрү Казакстан Кыргызстандан кирген эт азыктарына болгон чектөөнү алып салат. Анткени бул бизге жооп катары кабыл алынган чечим болчу. Бул тууралуу Sputnik Кыргызстан агенттигине Ветеринардык жана фитосанитардык мамлекеттик инспекциянын директору, башкы мал доктур Калыс Жумаканов билдирди.
Анын айтымында, учурда сүйлөшүүлөр жүрүүдө.
"Казакстандын Айыл чарба министрлигине кат жөнөтүлдү. Казак тарап чектөөнү алууга каршы эмес. Жакынкы күндөрү маселе чечилерине үмүт артабыз, себеби чектөө эскертүүсүз жана эч себепсиз киргизилген. Бул жооп катары көрүлгөн чара болчу, түшүндүңүздөр да", — деди Жумаканов.
Казакстандагы фермалардан куш тумоосу менен Ньюкасл вирусу катталбаганы аныкталгандан кийин Кыргызстан чектөөнү алып салган.